剛剛搬嚟瑞典後第一次過嘅週年紀念，我哋選擇去咗只在夏天開放，並且係 Stockholm 唯一一個遊樂場 — Gröna Lund 。
人未入場，在外面淨係見到過山車車軌，阿伯已經變咗大細路躍躍欲試，不斷重覆著：「好想試試呢度嘅過山車！」。大家見我又攀石，又放下一切遠走他方，都以為我好勇敢，好大膽。但實不相瞞，各位眼中勇字當頭嘅我，其實係冇膽坐過山車嘅小女子一名。跳樓機、海盜船、甚至乎洗衣機統統都 OK！但就只有過山車真係冇辦法。雖不至於完全冇膽去坐，不過每次玩完落返嚟，都只能默默地呆坐喺長櫈痛苦一整天。過山車實在可免則免。
眼見身邊人這般期待，又第一次嚟，車程睇落都好似唔係太過刺激姐⋯⋯好啦好啦，為咗唔想愛人失望，當係為咗紀念我哋同樣走過高高低低嘅感情：「上啦！我唔怕你嘅過山車！」
排緊隊上過山車嘅時候，我嘅腎上腺素開始直線上升。緊張爆燈，手心、腳掌，連對襪都濕曬。排排下，見呢邊嘅過山車只係玩一圈，再驚都不過係幾十秒，好在啫～
就喺我稍為放鬆一點點嘅時候，排喺我哋前面一行 6 人年紀 60+ 以上嘅瑞典叔叔們，可能見我們係外國人就很「好客」地誠意讓出車頭第一卡俾我們坐。唉，反正都洗濕咗個頭，坐邊個位都冇分別啦⋯ 一邊搭隻腳落車卡，一邊心裡不斷反覆安撫自己：「一個圈姐，一個圈姐，幾十秒好快過、好快過⋯」
終於、終於、終於望見終點啦！過山車開始減速準備泊站，亦代表我人生最長嘅數十秒秒就黎完結啦，yeah! 埋到站頭，工作人員講咗兩句我聽唔明嘅瑞典語，跟住全車人就一齊重覆起哄叫著：「en gång till、en gång till」。 下一刻過山車又再重新加速，將一頭問號嘅我再次全速送上雲霄之中。
雲霄之旅完結，阿伯向仍然腳步浮浮嘅我解釋剛剛嘅情況。原來當時工作人員話：「咁啱冇人排過山車喎。不如再嚟多轉啦，好唔好呀？」
咁全車人當然起哄講：「en gång till, en gång till」，即係 「encore, encore」嘅意思。
好一句「 en gång till」成為我嚟到瑞典後，第一句學識並牢記在心嘅瑞典語。果然，讀萬卷書都不如坐多轉過山車。
#瑞典 #斯德哥爾摩
Search